1. Ата-бабаны құрметтеу. Қазір жер бетіндегі ең басты мәселе – адамдар ата-бабасын құрметтеуді ұмытты. Шығыс-азия халықтарында бұл ежелден қалыптасқан дәстүр еді. Біз күш-қуаттың қайнар көзін – ата-бабаның батасынан, өз қанымыздан аламыз. Бұл теңдессіз күш. Сондықтан ең болмаса жылына бір рет о дүниелік ата-бабалардың басына барып тұрыңыз.
2. Туыспен байланыс. Қонаққа бару дәстүрі бүкіл әлемде, барлық дін өкілдерінде бар. Әрбір тұрмысқа шыққан әйел күйеуі мен оның туыстарының арасын жалғаушы көпір. Оларды қонаққа шақырып, қуантып, таңқалдырып тұрыңыз. Сонда олардың батасын алып, жақсы сөздер естисіз. Ал, бұл сізге шкаласы өте үлкен, ең қажет қуат көзі. Бәрін бірдей көру, адал, ашық болу – өте маңызды.
3. Күйеуді сүю. Сіз күйеуіңізді басты орынға қоятын боларсыз. Дегенмен, ең бірінші құрметке үлкендер лайық. Күйеуіңіздің ата-анасын өз туғаныңыздай сыйлаңыз. Өз туыстарыңызға қалай қызмет етсеңіз, күйеудің де туыстарына солай қызмет көрсетіңіз. Бұл әрекет жарыңыздың сізге деген ерекше ықыласын тудырады. Ең бастысы, ортада «көзсіз махаббат» орнайды. Шынайы махаббатқа әрбір адам ие болғысы келеді. Өзін өмірде бар болғаны үшін жақсы көрсе екен дейді. Бар мәселенің бастауы – осы. Психология айналып келгенде бүкіл ғаламды шынайы қабылдауға үйретеді. Сондықтан жарыңызға Құдайдың берген сыйы деп қараңыз. Күн сайын ғашық болыңыз.Ол сіз үшін бүкіл әлемді жаулап алатын батыр деп ойлаңыз. Оған қарағанда көздеріңіз от шашып тұрсын. Сүйікті әйелінен мұндай көзқарасты байқаған еркек өзін қаншалықты бақытты сезінетінін білсеңіз ғой…
4. Өз-өзін бағалау. Қуаттың қайнар көзі – өзіңіз. Өзін бағалай білу аса маңызды. Десе де, «Өзін жақсы көру» ұғымын шектен тыс қабылдамаған дұрыс. Өзіңізді әйел ретінде, әкеңіздің қызы, аға-әпкелердің бауыры, муза, ана және жай ғана адам ретінде жақсы көріңіз. Күніне бір сағат уақытыңызды тек өзіңізге арнаңыз. Ой, сезім, іс-әрекетіңізбен оңаша қалыңыз. Жеке істеріңізден ләззат алып, айнаға қарағанда күлімдеңіз. Өзіңізді мақтап, өзіңіз туралы тек жақсы сөз айтуды үйреніңіз. Сонда ғана сіз басқа адамның бойынан жақсы қасиеттерді танисыз. Өзіңізді үнемі қадағалап жүріңіз.
5. Балалар — байлығыңыз. Көптеген әйелдер балаларын асыра бағалайды. Олар үшін өзін де күйеуін де елеусіз қалдырады. Бұл үлкен қателік. Мұндай шексіз қамқорлық отбасының ыдырауына әкеп соқтыруы мүмкін. Бала – қуат көзіміз. Балалы болу, оны өсіру туралы дұрыс пікір қалыптастырып, олармен жақсы қарым-қатынас жасай алсақ, олар сөзсіз – өмірдің ғажайыбы. Әрқайсысына күніне бір сағат арнап, өмірінің, мінезінің жақсы жаққа қарай өзгеруіне септігін тигізіңіз. Күнде бала өміріндегі өзгерістерді аңғарыңыз. Олармен кез келген жерде уақытты көңілді өткізуге тырысыңыз.
6. Жігер күш – білімде. Білімге құштар болыңыз, барлығына қызығушылық танытыңыз. Күнде әртүрлі нәрсемен шұғылданыңыз. Уақытты босқа өткізбеңіз. Кемінде бір бет кітап оқысаңыз, ол күн бекер өткен жоқ. Сіздің парасатыңыз – қуатыңыздың жоғарғы көрсеткіші.
7. Жаратушыдан. Ең күшті қуат көзі – әлемнің Жаратушысында. Әсіресе Ислам дініндегі қағидалар өмір философиясына негізделген. Қазір психология «адаммен жұмыс жасауға ой деңгейі мен физиология жеткіліксіз» деуде. Бұл жерде жанды қозғау және қорғау керек. Ал, жан әрқашан келген жағына қарай талпынып тұрады. Яғни, өзінің Жаратушы иесіне.
Осы айтылған жеті негіз өзара үйлескенде өміріңіз де табиғаттың көркем келбетіндей ғажайып күйге еніп, шабыт көздері пайда болады. Осыларды игермей, алып күшке ие бола алмайсыз. Күш-қуаты тасып, бойында қаны қызып жүретін әйелдің қолынан көп нәрсе келеді. Ол жан-жағына нұрын шашып, жігерлендіріп, күйеуінің әрқашан шабыттандырушысы бола алады.
Зульфия Мұратқызы,
лайф-коуч, сананы жаттықтырушы
психолог, «an-Nisa» Life Project жобасының авторы
