Пәтер ішін қайта жоспарлау барысы газбен жылыту қазандығын ауыстырып, оның орнына жаңа детальдер орнатумен басталды. Үй минимализм үлгісіне негізделіп, бірнеше заманауи стильдің қосылуы арқылы толық жүзеге асты. Бөлменің ауасы кең болу үшін қабырғаларды ағаш жабынымен біріктіріп, батыл шешімдер қабылдауға тура келді. Сонымен қатар, витраж есік-терезелерді, биік өсімдіктерді, ультразаманауи трансформер-жиһаздарды қолдандым.
Неоклассика үлгісіндегі жиһаздар, консоль, ескі шырағдандар, бөлме пішінінің стандартына сай келмейтін, көлемді қара түске боялған аспашамдар да интерьерге ерекшелік сыйлайды.
Бұл жобаның өзгешелігі сол – мұнда әр түрлі стильдердің үлесі бар. Неоклассика стиліндегі жиһаз, аспашам мен аксессуарлар, заманауи үлгідегі жуынатын бөлмедегі ақ мәрмәрдан жасалған декор, барлығының арасында нәзік үндестік орнаған.
Минимализм стиліндегі асүй қара түсті классикалық аспашаммен және жиегі қараға боялған үлкен айнамен тамаша үйлесіп тұр.
Үй ішіндегі композицияның шарықтау шегі – әйгілі суретші Асқар Есдәулеттің туындысы. Интерьердің ерекшелігі мен энергиясын дәл осы картина толық ашып тұр. Бұл пәтерден еркіндік пен гармонияның жылы лебі сезіледі.
Идея авторы: Қарлығаш Аязбаева
Интерьер-дизайнері
