Байқауға қатысушылар мен орталық қызметкерлері балалар үшін қызықты іс-шаралар мен жарқын әсерге толы ұмытылмас күн сыйлады.
14 қыркүйекте «Қазақстан аруы» ұлттық сұлулық байқауының ұйымдастыру комитеті «Парасат» ғылыми-технологиялық орталығының өкілдерімен бірлесе отырып, мүгедектігі бар 30 бала мен олардың ата-аналарын қолдау мақсатында қайырымдылық акциясын ұйымдастырды. Іс-шараға «Қазақстан аруы» байқауының биылғы маусымдағы әлеуетті қатысушылары, сондай-ақ өткен жылғы жеңімпаздар – «Жер аруы Қазақстан -2022» атағының иегері Дильназ Тилаева және «Вице мисс -2022» атағының иегері Томирис Заир қатысты.
Іс-шара аясында түрлі шаралар ұйымдастырылды: Алматы ботаникалық бағын аралау, табиғат аясында серуендеп, тамақтану, балаларға арналған фотосессия, ән мен би де болды. Бұл шараның барлық қатысушылары үшін дәмді ас SunGroup мейрамхана холдингінің және Manana мейрамханасының қолдауымен өтті.
«Парасат» ғылыми-техникалық орталығы 2005 жылы құрылып, содан бері арнаулы әлеуметтік қызмет көрсетуде. Қазір мұнда төрт бөлім бар: мүгедектігі бар балаларға арналған екі әлеуметтік қызмет көрсету бөлімі, психоневрологиялық ауруы бар 18 жастан асқан адамдарға арналған бөлім және жартылай стационарлық күндізгі бөлім.
Қазіргі уақытта орталықта 18 жасқа дейін және одан жоғары 280 балаға қызмет көрсетіледі, олардың 55-і күндізгі бөлімде оқиды. Мұнда жеті түрлі арнаулы әлеуметтік қызмет көрсетіледі: әлеуметтік-тұрмыстық, әлеуметтік-медициналық, әлеуметтік-психологиялық, әлеуметтік-педагогикалық, әлеуметтік-мәдени, әлеуметтік-экономикалық және әлеуметтік-құқықтық қызметтер. Орталықтың жұмысы толығымен мүгедектігі бар балалар мен олардың ата-аналарына олардың жағдайын қалыпқа келтіру және қоғамға бейімделуіне көмектесуге бағытталған.
Іс-шарадан кейін «Қазақстан аруы» ұйымдастыру комитеті әр балаға естелік сыйлықтар, ал «Парасат» орталығына – церебральды сал ауруына шалдыққан балаларға арналған жүгіру жолағы мен кварц құмымен сурет салуға арналған жарқырайтын планшеттер сыйлады. Олардың көмегімен балалар орталықта уақыттарын одан да пайдалы әрі қызықты өткізе алады!
«Қазақстан аруы» ұлттық сұлулық байқауы мен «Парасат» ғылыми-технологиялық қоры бірігіп, ерекше балаларға ұмытылмас қуаныш сыйлап, қолдау көрсетті. Бұл мейірімділікке толы іс-шара біздің қолдауымызға мұқтаж жандарға ынтымақтастық пен қамқорлықтың маңызды екенін еске салады.
