Қауіп қайдан?
Уақыт озған сайын мұрынның төмен жағындағы әжімдер жүзіңізді айғыздап, өз ізін қалдырады. Бұл – табиғи құбылыс. Мұрын мен ерін арасындағы әжімдердің басты себепкері – ым-ишаралар. Олар арық қыздарда қатты білінеді. Өйткені жіптіктей бойжеткендердің тері астындағы май қабаты жұқа. Сонымен қоса, кенет бір айдың ішінде 5 келіден көп салмақ тастасаңыз да қыртыстар айқындала бастайды. Бетті салбырататын ақырғы себеп – түнде су ішу.
Алдын-алу
Ең тиімді амал – Асахи массажы. Массаж былай жасалады: саусақтарыңызды иектің дәл ортасына қойыңыз. Осылайша басып тұрып, бірте-бірте езуіңізге қарай жылжытыңыз. Теріңіз жоғары қарай көтеріліп бара жатқандай сезінесіз. Бұл – қалыпты жағдай. Осы әрекетті жасай отырып, 2-3 секунд қатпарларды не оның пайда болатын орнын уқалайсыз.
Мұнымен бітпейді. Тағы нәтижесі бар бодифлекс тәсілін ұсынамыз. Арнайы тыныс алу арқылы жасалатын жаттығулар кешенінің әсері тез байқалады.
- Жымиыңыз. Сосын ерніңізге сұқсаусағыңызды тақаңыз. Ренжіген кейіп танытқандай езуіңізді төмен түсіріңіз. 50 рет қайталау қажет.
- Ауызды ауаға толтырып, оны баяу шығарыңыз.
- 50 рет «үйрек» ерін жасап, қайтадан босатыңыз.
- Мұрын мен ерін арасындағы қатпарды 10 секунт саусақ ұшымен қатты басып, босатыңыз. 25 рет жасау керек.
Емдеу
Мұрын-ерін әжімін кетіретін бетмай, сарысу немесе қандай да бір косметикалық құрал бар дегенді естісеңіз – сенбеңіз. Ондай зат жоқ. Іздеп әуреленбеген дұрыс. Қатпардан құтылудың бірден-бір жолы бар. Ол – теріге дәрі егу. Терең әжімнен арылудың ең қарапайым, барынша әсерлі де шынайы түрі. Қолайлысы – қауіпі төмен. Тек бетте кішкене ісік пайда болады. Дегенмен, бір еккізген жан – оған бағынышты. Сұлулықты 9-12 ай сақтап тұрады. Кейде жарты жыл болуы да ғажап емес.
Қазір гиалурин қышқылы негізінде жасалған дәрі-дәрмектер егу кең тараған. Оны рұқсат қағазы бар пластикалық оташы ғана жүзеге асырады. Нәтижесі әп-сәтте білінеді. 3 айдан бір жылға дейін жүзіңізге әр беріп тұрады. Өзгелер сияқты өзіне бағынышты етпейді. Ең бастысы, дәрігердің дипломының, сертификатының барына көз жеткізіңіз. Тәжірибесіне назар аударыңыз. Сонымен қатар, дәрі-дәрмектер мен құрал-сайманның таза екенін қадағалаңыз.
